BOCADILLU

         Yo nun toi acostumbrau a lleer coses sobre'l menú esquisitu que siempre taba incluíu nel platu del día de les nuestres époques infantiles. Refiérome al inmortal "bocadillu", fechu artesanalmente por mi má con media barra pan, cortá trasversalmente, que llevaba dientro unes cuantes raxes de chorizu pamplona o varies sardines n'escabeche y que comíase pa merendar mientres tabamos echando un partíu de fúbol colos collacios, nel prau de detrás de la mio casa n'El Entregu. Anque fui cumpliendo años, la afición pol bocadillu sigue intacta y ye'l día de güei, qu'entovía saboreo esti platu esquisitu, comparable con cualquier especialidá del Restaurante Arzak, posiblemente la casa de comides más renombrá del norte d'España y una de les más prestixioses de la cocina nacional. Agora volvíme más sibarita y ensin olvidar les materies primes básiques, aporto combinaciones qu'enllenen el mio palladar, ca vez más entendiu nel arte cullinariu caseru. Recomiendo una receta con patente propia paque faigáis un bocadillu que va gustavos asgaya. Tomar nota:

         Cómprase una barrina pan estrechina, qu'en llingua cursi nes panaderíes llámen-i "baguette"; córtase la barra -como siempre- pola mitá; una parte úntase con sobrasá mallorquina y na otra espárcese bien un migayin de mermelá d'arándanos; nel medio de les dos partes distribúyense, uniformemente, moxones en salsa picante y pa terminar, enriba los moxones, pónense unes raxes de xamón serranu. ¡Ya ta llistu'l bocadillu!. Ya podéis disfrutar masticando gloria bendita. Ye bueno echar un traguín de cerveza con casera -de xemes en cuandu- pa nun atragantáse.

         Esti episodiu que resalta les dellicies naturales d'aquelles meriendes típiques infantiles ta fundamentau nun concursu mundial que cellebróse'n Madrid la semana pasá y al que concurrieron más de 100 bocadillos preparaos por cocineros de los mas remotos llugares del planeta. El ganaor fue un cocineru vascu, Ander Calvo, que presentó un bocadillu fechu con crema de quesu de cabra fundíu, tomate rebozao, unes llonches de paletilla ibérica, salteao de champiñones al ayillu y pimientu verde rayau. Vese a primera vista que los bocadillos modernos tienen esquema muy parecíu a platos de postín, empleando soporte a base de pan que sustituye a la loza y a la porcelana onde se faen guisos suculentos de restaurantes acreditaos.

         Debemos mantener les tradiciones de coses sanes, naturales y sabroses. Yeren bocadillos anantes y son bocatas agora. Non importa la modernidá del términu llinguísticu. Nun podemos dexar que coma terreno los sucedáneos qu'importen les marques americanes y que ponen nombres rimbombantes pa enganchar a les nueves xeneraciones. Los "sandwich", los "fast food", los "mc-pollo" y los "canapés" deben considerase comida de mínimu prestixu. Na d'éso ye meyor que un buen BOCADILLU DE CHORIZU o de XAMON SERRANU.

Aurelio

San Sebastián